Stop Motion

2018-03-30

D’Kanner aus dem Cycle 3 hunn un engem Workshop zum Thema Stop Motion Filmer deelgeholl. Zesumme mat de Formateure vun EducDesign hu si selbststänneg kleng Filmer produzéiert a publizéiert. Niewent der eigentlecher Regie hunn d’Kanner och selwer d’Dréibuch fir de Film geschriwwen, d’Personnagen ausgewielt an och ee flotten Hannergrond gesicht oder gemolt.

» Zu de Videos

D'Aerenzdallschull spend un UNICEF

2018-03-15

E Méindeg, de 5. März hunn eis Kanner dem Paul Heber vun UNICEF Lëtzebuerg e Scheck vun 1500€ iwwerreecht. Dobäi handelt et sech em den Erléis vun eisem Chrëschtmaart.
D'Kanner hate ganz vill Froen un den Här Heber, an hien huet eis erkläert, dass déi Sue gebraucht ginn fir d'Educatioun vun de syresche Flüchtlingskanner, déi an de jordanesche Flüchtlingscamp'e liewen.

Krëschtmaart an der Ärenzdallschull

2017-12-03

De Mëtteg ass grousse Krëschtmaart vu 14.00 bis 18.00 Auer an der Sportshal vun der Ärenzdallschull. 
Et gëtt vill ze kucken an ze schmaachen, an ee schéine Konzert vun der Fielser Musik steet och um Programm!

Eis Schüler um Weltkannerdag

2017-11-20

D'Schüler vum Cycle 4 hunn den 20. November, den internationalen Dag vun de Kannerrechter, um "Kidhack" vun UNICEF Lëtzebuerg deelgeholl. Deen Dag sollten d'Kanner de Kommando vun der Politik a vun de Medien iwwerhuelen.
2 Woche virdrun ware mir bei RTL Radio Lëtzebuerg, fir Texter opzehuelen, déi um Weltkannerdag um Radio diffuséiert gi sinn. Eis Kanner hu sech vill Méi ginn a Reportagen opgeholl, Witzer erzielt, d'Kannerrechter opgesot, etc. Duerno krute mer och nach eng Visite guidée duerch d'Studioen vun RTL Télé Lëtzebuerg.
Um Weltkannerdag ass eng kleng Delegatioun vum Cycle 4 vum Premierminister Xavier Bettel am Staatsministère empfaang ginn. Do konnten d'Kanner him Froen zum Thema Kannerrechter, awer och méi perséinlech Froe stellen. Den Här Bettel huet eis ganz vill erzielt, hien huet eis seng modern Konschtsammlung gewisen a mir krute suguer nach ee klengen Abléck a säi Bureau.
Ee grousse Merci un UNICEF Lëtzebuerg, RTL Radio an Télé Lëtzebuerg an natierlech un eise Premierminister fir des wonnerschéin an onvergiesslech Erfahrung!